ABŞ-ın Corciya ştatında tüğyan edən meşə yanğınları 39 500 akrdan çox ərazini məhv edib, 120-dən artıq evi isə külə döndərib. Bu barədə rəsmilər məlumat verib.
Ştatın cənub-şərqindəki iki böyük yanğın – "Pineland Road" və "Highway 82" yanğınları – Corciya qubernatoru Brayan Kempi 91 rayonda 30 günlük fövqəladə vəziyyət elan etməyə vadar edib.
Corciya Meşə Təsərrüfatı Komissiyasının direktoru Conni Sabo video açıqlamasında bildirib ki, "Hazırda hava o qədər qurudur ki, kiçik bir qığılcım belə tez bir zamanda təhlükəli meşə yanğınına çevrilə bilər."
Fövqəladə hallar xidmətinin əməkdaşları həmçinin bir sıra kiçik yanğınlarla mübarizə aparır. Şənbə günü 50 akr ərazini əhatə edən 32 yeni yanğın qeydə alınıb.
Sabo əlavə edib: "Biz həddindən artıq quraqlıq şəraitindəyik və meşə yanğınlarının fəallığı artıq son beş illik orta göstəricimizi ötüb."
Yanğınlar aprelin 18-də başlayıb, qubernator Kemp isə dörd gün sonra fövqəladə vəziyyət elan edib.
Corciya Meşə Təsərrüfatı Komissiyasının (GFC) məlumatına görə, "Highway 82" yanğınının elektrik xəttinə toxunan folqa şardan qaynaqlandığı ehtimal edilir. Bu yanğın indiyədək təxminən 7 500 akr ərazini əhatə edib və onun yalnız 10 faizi nəzarət altına alınıb.
GFC bildirib ki, 32 000 akr ərazini yandırıb külə çevirən "Pineland Road" yanğınının səbəbi isə qaynaq işləri zamanı düşən bir qığılcım olub.
Cümə günü verilən məlumata görə, "Pineland" yanğınında ən azı 35 "kiçik tikili" məhv olub, 187 ev isə hələ də təhlükə altındadır.
Ştatın 91 rayonunda açıq havada od yandırmaq qadağan edilib. Bu qadağa zibil və kənd təsərrüfatı tullantılarının yandırılmasını əhatə edir.
BBC-nin ABŞ-dakı media tərəfdaşı "CBS News"a danışan Dudek ailəsi, əşyalarını toplamağa başlayarkən alovların mülklərinə çatdığını izləyib.
Uşaqlarını və ev heyvanlarını təxliyə edərkən, Anna Dudek telefonunun təhlükəsizlik kamerası vasitəsilə alovların evlərini necə bürüdüyünü izləyib.
O, "CBS News"a deyib: "Hər iki cihazım oflayn olanda, hər yer qaranlıqlaşanda və artıq heç nə görə bilməyəndə, bu, çox ürəkdağlayıcı idi, çünki o zaman başa düşdüm ki, onlar… mənim ev dediyim yeri ələ keçiriblər."
Mənbə: BBC News
